ხმის დამთვლელი კომისიის თავმჯდომარე აკადემიკოსი მინდია სალუქვაძე აცხადებს კენჭისყრის შედეგებს: სიით 113 ამომრჩევლიდან აკადემიკოს თამაზ გამყრელიძეს ხმა მისცა 111 წევრმა (შესანიშნავი შედეგი - ალბათ 99,99 პროცენტი), ერთი ხმა - წინააღმდეგი, ერთი ბიულეტენი - გაუქმდა. ამრიგად, 20 იანვრის 15 საათიდან საქართველოს მეცნიერებათა აკადემიას (მალე, ალბათ, სახელშეცვლილს - «საქართველოს მეცნიერებათა ეროვნულ აკადემიას») მეხუთე პრეზიდენტი ჰყავს  აკადემიკოსების ნიკო მუსხელიშვილის, ილია ვეკუას, ევგენი ხარაძისა და ალბერტ თავხელიძის შემდეგ - აკადემიკოსი თამაზ გამყრელიძე.

       აკად. თამაზ გამყრელიძემ მადლობა გადაიხადა ასეთი მაღალი პატივისა და ნდობისათვის და იმედი გამოთქვა, რომ ერთობლივი ძალისხმევით გადაწყდება ყველას წინაშე მდგარი რთული ამოცანები.

2005 წ. 10 ივნისი, N136.

 . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
       ...საქართველოს მეცნიერებათა აკადემიის საერთო კრებამ თითქმის ერთხმად
(113 ამომრჩევლიდან წინააღმდეგი იყო მხოლოდ ერთი) აკადემიის
ხელმძღვანელად აირჩია საერთაშორისო კლასის მეცნიერი, რუსეთის
მეცნიერებათა აკადემიის აკადემიკოსი, რამდენიმე უცხოური აკადემიის საპატიო
წევრი, მრავალი პრესტიჟული საერთაშორისო პრემიისა და ჯილდოს ლაურეატი,
მათ შორის საკავშირო სახელმწიფო პრემიისა, აკადემიკოსი თამაზ გამყრელიძე.
მეცნიერი, რომელიც ფლობს 30 ენას; იგი ცნობილია თავისი დემოკრატიული
შეხედულებებით ჯერ კიდევ საბჭოთა კავშირის არსებობის დროიდან.
       ეს არის ადამიანი, რომელიც არ შეშინდა, საკავშირო კომუნისტური პარტიის
ყრილობის ტრიბუნიდან გამოსულიყო თბილისში მომხდარი მოვლენების
შეფასებით (იგულისხმება აკადემიკოს თამაზ გამყრელიძის ცნობილი გამოსვლა
სახალხო დეპუტატთა I ყრილობაზე მოსკოვში 1989 წლის 9 აპრილის
ტრაგიკული მოვლენების შესახებ. რედ.). არჩევისთანავე მეცნიერებათა აკადემიიის
პრეზიდენტმა ინტერვიუში განაცხადა, რომ აუცილებლად მიაჩნია
ხელმძღვანელობის თანამედროვე მეთოდების დანერგვა, აკადემიის
რეორგანიზაცია, ასევე ზოგიერთი აკადემიური ინსტიტუტის გაერთიანება.
ინსტიტუტების შერწყმა შტატების შემცირებას გამოიწვევს, მაგრამ ეს
არაპოპულარული ნაბიჯი, თამაზ გამყრელიძის განცხადებით, დროის
მოთხოვნილებაა.
      მთელი რიგი ინსტიტუტების გაერთიანდება, მაგრამ ისინი, როგორც აქამდე
იყო, აკადემიის გამგებლობაში დარჩება. უნდა აღინიშნოს, რომ ბოლო დროს
გავრცელებული ხმები იმის თაობაზე, რომ მეცნიერებათა აკადემია უქმდება,
მცდარი გამოდგა. აკადემია არამცთუ არ დაიშალა, პირიქით, მან დაიცვა
თავისი დამოუკიდებლობა, კიდევ უფრო განიმტკიცა თავისი როლი და
მნიშვნელობა, შეძლო დაემტკიცებინა ხელისუფლებისათვის, რომ საჭიროა
მისი საქმიანობისათვის დაფინანსების მომატება. არავითარი ლაპარაკი აღარ
არის, ყოველ შემთხვევაში ამ ეტაპზე, მეცნიერებათა აკადემიის არც განათლებისა
და მეცნიერების სამინისტროში შესვლისა და არც თბილისის სახელმწიფო
უნივერსიტეტთან გაერთიანების თაობაზე (რაც ადრე იგეგმებოდა).
     მეცნიერებათა აკადემიის პრეზიდენტს ფორმალურად ამტკიცებს ქვეყნის
პრეზიდენტი. ვფიქრობთ, ამ თვალსაზრისით თამაზ გამყრელიძეს პრობლემები
არ ექნება.
     ასეა თუ ისე, მოვლენათა ასეთი განვითარება საქართველოს მეცნიერებათა
აკადემიის გამარჯვებაა და გამარჯვება ყველა იმ მეცნიერისა, რომლებიც
მრავალი თვის მანძილზე ხელისუფლების ყველა ეშელონში იცავდნენ აკადემიის
თავისთავადი არსებობის უფლებას დამოუკიდებელი ორგანიზაციის სტატუსით.
 

 џ შესაბამისად «საქართველოს კანონისა საქართველოს მეცნიერებათა ეროვნული აკადემიის შესახებ», აკად. თამაზ გამყრელიძე 2008 წლის 19 ივნისს ხელახლა იქნა არჩეული «საქართველოს მეცნიერებათა ეროვნული აკადემიის» პრეზიდენტად –აკადემიის საერთო კრებაზე გამართული ფარული კენჭისყრის შედეგად (მომხრე – 93, წინააღმდეგი – 3, გაუქმებული ბიულეტენი – 1).