წესდება

საქართველოს მეცნიერებათა ეროვნული აკადემიის წესდება

თავი I

ზოგადი დებულებები

1. საქართველოს მეცნიერებათა ეროვნული აკადემია არის საერთაშორისო მნიშვ­ნელობის მიღწევებისა და მაღალი სამეცნიერო ავტორიტეტის მქონე პირთა გაერთიანება, რომელიც არის მემკვიდრე და ტრადიციების გამგრძე­ლებელი უძველესი ქართული განათლებისა და სუ­ლიერების კერების – გელათისა და იყალთოს აკა­დემიებისა. იგი არის საქართველოს მთავრობის მეცნიე­რული მრჩეველი.
2. საქართველოს მეცნიერებათა ეროვნული აკადემია წარმოადგენს წევრობაზე დაფუძ­ნებულ საჯარო სამარ­თლის იურიდიულ პირს, საქართველოს მეცნიერებათა აკადე­მიის უფლებამონაცვლეს, რომლის წევრები არიან აკადემიის ნამდვილი წევრები (აკადემიკოსები), აკადე­მიის წევრ-კორესპონდენტები, საპატიო აკადემიკოსები და აკადემიის უცხოელი წევრები.
3. საქართველოს მეცნიერებათა ეროვნული აკადემია თავის საქმიანობაში ხელმძღვა­ნელობს საქართველოს კონსტიტუციით, საქართველოს კანონით „საქართვე­ლოს მეცნიერებათა ეროვნული აკადემიის შესახებ“, საქართველოს კანონმდებლობითა და აკადემიის წეს­დებით.
4. საქართველოს მეცნიერებათა ეროვნული აკადემია არის თვითმართვადი სამეცნიერო დაწესებულება, რომელიც დამოუკიდებლად ამტკიცებს თავის წესდებას, განსაზ­ღვრავს თავის სტრუქტურას, წყვეტს სამეცნიერო-ორგანიზაციულ, საკადრო, ეკონო­მიკურ და საერთა­შორისო თანამშრომლობის საკითხებს.

თავი II

საქართველოს მეცნიერებათა ეროვნული აკადემიის მიზნები და ამოცანები

1. საქართველოს მეცნიერებათა ეროვნული აკადემიის მიზნებია:

ა)    საქართველოში მეცნიერების განვითარების ხელშე­წყობა;

ბ)    ფუნდამენტური და გამოყენებითი ხასიათის კვლევების წარმოება და ხელშეწყობა;

გ)    სახელმწიფო ენებზე ზრუნვა და ამ ენებზე სამეცნიერო ტერმინოლოგიის სრულყოფა;

დ)  ქვეყანაში მეცნიერების განვითარების პროგნოზი­რება. მსოფლიო მეცნიერების უახლეს მიღწევებზე დაყრდ­ნობით სახელმწიფო პრიორიტეტების შესახებ წინადა­დებათა შემუშავება და შესაბამისი რეკომენ­დაციების მთავრობაში წარდგენა;

ე) ქვეყანაში წარმოებული მეცნიერული კვლევის შედე­გების ექსპერტიზა;

ვ) მეცნიერული მიღწევების საზოგადოებისთვის გაცნო­ბა და საქართველოს მეცნიერთა მიერ მოპოვებული მიღ­წევების საერთაშორისო ასპარეზზე წარმოჩენა.

2. თავისი მიზნების განსახორციელებლად საქართველოს მეცნიერებათა ეროვნული აკადემია:

ა) ეწევა სამეცნიერო-კვლევით და ექსპერტული ხასიათის საქმიანობას, რისთვისაც საჭიროების შემთხვევაში ქმნის სათანადო სტრუქტურულ ერთეულებს;

ბ) განიხილავს და აფასებს საქართველოს უმაღლესი საგან­მანათლებლო დაწესებუ­ლებებისა და სამეც­ნიერო-კვლევითი ინსტიტუტების (გარდა საჯარო სა­მართლის იურიდიული პირის – ტექნოლოგიური ინსტიტუტისა) სამეცნიერო საქმიანობის ამსახველ წლიურ ანგარიშებსა და დასრულებულ სამეცნიერო-კვლევით სამუშაოებს, რისთვისაც უფლებამოსილია ამ ორგანიზაციებისაგან გამოითხოვოს საჭირო დამა­ტებითი ინფორმაცია და შეფასებები აცნობოს ამავე ორგანიზაციებს, საქართვე­ლოს განათლებისა და მეც­ნიერების სამინისტროსა და მეცნიერების განვითა­რების ფონ­დებს;

გ) ატარებს სამეცნიერო კვლევების ექსპერტიზას, აწყობს სამეცნიერო დისკუსიებს, სიმპოზიუმებსა და კონ­ფერენციებს;

დ) გამოსცემს ბეჭდვით და ელექტრონულ სამეცნიერო ჟურნალებსა და სხვა პერიოდულ გამოცემებს, ახორ­ციელებს სამეცნიერო ლიტერატურის საერთაშორისო გაცვლას;

ე) ეწევა სამეცნიერო მიღწევათა და მეცნიერული მემკვი­დრეობის პოპულარიზაციას; ატარებს საჯარო ლექ­ციებს საგანმანათლებლო დაწესებულებებში;

ვ) აარსებს და ანიჭებს პრემიებს მეცნიერებისა და ტექნოლოგიების დარგში მნიშვნე­ლოვანი სამეცნიერო სამუშაოების წარმოსაჩენად;

ვ1) აწესებს სტიპენდიებს და წარმატებულ მეცნიერებს, რომ­ლებიც აკადემიის წევრები არ არიან, ირჩევს აკადემიის სტიპენდიატებად;

ზ) უფლებამოსილია გახდეს საერთაშორისო სამეცნიერო ორგანიზაციების წევრი; ამყარებს კავშირებს მსოფ­ლიოს წამყვან მეცნიერებთან და სამეცნიერო ცენტ­რებთან;

თ) კოორდინაციას უწევს სამეცნიერო დაწესებულებების კვლევით საქმიანობას;

ი) ქმნის კომისიებს მეცნიერებისა და ტექნოლოგიების სხვადასხვა დარგში;

კ) უფლებამოსილი პირის წერილობითი მიმართვის სა­ფუძველზე ინახავს მეც­ნიერებისა და კულტურის მოღვაწეთა პირად არქივებს, რომლებიც ფასეულია საქართველოს ისტორიისათვის;

ლ) დარგების მიხედვით ანიჭებს წლის საუკეთესო სამეცნიერო-კვლევითი დაწესებულების ტიტულს და გასცემს ჯილდოებს;

მ) ახორციელებს აკადემიის ამოცანებთან დაკავშირებულ სხვა, მათ შორის დამხმარე ეკონომიკურ საქმიანობას კანონმდებლობით დადგენილი წესით.

თავი III

საქართველოს მეცნიერებათა ეროვნული აკადემიის წევრები და აკადემიის სტიპენდიატები

1. აკადემიის ნამდვილი წევრების (აკადემიკოსების) საერთო რაოდენობა სამოცდაათს არ უნდა აღემატე­ბოდეს, აკადემიის წევრ-კორესპონდენტთა რაო­დენობა   ოცდაათს, ხოლო სტიპენდიატთა რაოდენობა ათს.
2. საქართველოს მეცნიერებათა ეროვნული აკადემიის ნამდვილ წევრად (აკადემიკოსად) შეიძლება აირჩეს საქართველოს მოქალაქე, საქართველოში მოღ­ვა­წე, მაღალი სამეც­ნიერო ავტორიტეტის მქონე მეცნიერი, რომელსაც საერთა­შორისო დონის წვლილი აქვს შეტანილი მეცნიერების განვითარებაში.

აკადემიის წევრ-კორესპონდენტად შეიძლება აირჩეს საქართველოს მოქა­ლაქე, საქართველოში მოღვაწე, მაღალი სამეცნიერო ავტორიტეტის მქონე მეც­ნიერი, რომელსაც მნიშვნელოვანი წვლილი აქვს შეტანილი მეცნიერების განვითა­რებაში.

3. საქართველოს მეცნიერებათა ეროვნული აკადემიის საპატიო აკადემიკოსად შეიძლება აირჩეს საქართველოს მოქალაქე, საყოველთაოდ აღიარებული მოღვაწე, რო­მელ­საც დიდი წვლილი აქვს შეტანილი საქართველოს მეცნიერების ან/და კულტურის განვითარებაში.
4. საქართველოს მეცნიერებათა ეროვნული აკადემიის უცხოელ წევრად შეიძლება აირჩეს გამოჩენილი მეც­ნიერი და საზოგადო მოღვაწე − უცხო ქვეყნის მოქალაქე.
5. საქართველოს მეცნიერებათა ეროვნული აკადემიის სტიპენდიატად შეიძლება აირჩეს დოქტორის აკადე­მიური ხარისხის ან მასთან გათანაბრებული სამეც­ნიერო ხარისხის მქონე პირი, რომელიც საერთაშორისო დონეზე აღიარებული სამეცნიერო ნაშრომების ავ­ტორია.
6. საქართველოს მეცნიერებათა ეროვნული აკადემიის სტიპენდიატად არ შეიძლება აირჩეს პირი, რომლის ასაკი 50 წელს აღემატება. იგი უნდა იყოს საქართველოს მოქალაქე და მოღვაწეობდეს საქართველოში. პირი აკადემიის სტიპენდიატად აირჩევა 5 წლის ვადით. ერთი და იმავე პირის აკადემიის სტიპენდიატად არჩევა შეიძლება მხოლოდ ორჯერ.

თავი IV

საქართველოს მეცნიერებათა ეროვნული აკადემიის მართვის პრინციპები და მართვის ორგანოები

1. საქართველოს მეცნიერებათა ეროვნული აკადემიის მართვა ხორციელდება არჩევი­თობის, დემოკრატიუ­ლო­ბისა და გამჭვირვალობის პრინციპებზე დაყრდ­ნობით.
2. საქართველოს მეცნიერებათა ეროვნულ აკადემიას მართავენ:

ა) აკადემიის საერთო კრება

ბ) აკადემიის პრეზიდიუმი

გ) აკადემიის პრეზიდენტი

3. საქართველოს მეცნიერებათა ეროვნული აკადემიის პრეზიდენტისა და აკადემიის ვიცე-პრეზიდენტის თა­ნამდებობები აკადემიის ადმინისტრაციული თანამდე­ბობებია.

თავი V

საქართველოს მეცნიერებათა ეროვნული აკადემიის საერთო კრება

1. საქართველოს მეცნიერებათა ეროვნული აკადემიის მართვის უმაღლესი ორგანოა აკადემიის საერთო კრება, რომლის მუშაობაში ხმის უფლებით მონაწილეობენ საქა­რთველოს მეცნიერებათა ეროვნული აკადემიის ნამდვილი წევრები (აკადემიკოსები) და აკადემიის წევრ- კორესპონდენტები, ხოლო სათათბირო ხმის უფლებით − საპატიო აკადემიკოსები, საქართველოში მყოფი აკადემიის უცხოელი წევრები და აკადემიის სტიპენდიატები.
2. საქართველოს მეცნიერებათა ეროვნული აკადემიის საერთო კრება:

ა) ამტკიცებს აკადემიის წესდებასა და აკადემიის სტრუქტურას აკადემიის ნამდვილი წევრების (აკადე­მიკოსების) და აკადემიის წევრ-კორესპონდენტების სიითი შემად­გენლობის (შემდგომ − სიითი შემადგენ­ლობის) უმრავლესობით;

ბ) განსაზღვრავს აკადემიის საქმიანობის ძირითად მიმარ­თულებებს;

გ) საქართველოს მეცნიერებათა ეროვნული აკადემიის ნამდვილი წევრებისაგან (აკადე­მიკოსებისაგან) ირჩევს აკადემიის პრეზიდენტს, აკადემიის ვიცე-პრეზი­დენტს, აკადე­მიის აკადემიკოს-მდივანს, აკადემიის სამეცნიერო განყოფილებათა (შემდგომ − განყო­ფი­ლება) აკადემი­კოს-მდივნებს და აკადემიის პრეზი­დიუმის სხვა წევ­რებს ფარული კენჭისყრით, სიითი შემადგენლობის უმრავლესობით, ხუთი წლის ვადით;

დ) ვადამდე გამოიწვევს აკადემიის პრეზიდიუმის წევ­რებს ფარული კენჭისყრით, სიითი შემადგენლობის 3/5-ით;

ე) იხილავს და ამტკიცებს აკადემიის წლიურ ანგარიშს და წარადგენს დასაბუთებულ მოთხოვნას მომავალი წლის საბიუჯეტო დაფინანსებაზე;

ვ) ირჩევს აკადემიის ნამდვილ წევრებს (აკადემიკოსებს), წევრ-კორესპონ­დენტებს, საპა­ტიო აკადემიკოსებს, აკა­დემიის უცხოელ წევრებსა და აკადემიის სტიპენ­დიატებს;

ზ) იხილავს სამეცნიერო ეთიკასთან დაკავშირებულ სა­კითხებს.

3. საქართველოს მეცნიერებათა ეროვნული აკადემიის საერთო კრება მოიწვევა საჭირო­ებისამებრ, მაგრამ წელიწადში ორჯერ მაინც. საერთო კრების მოწვევა სავალდე­ბულოა, თუკი ამას ითხოვს ხმის უფლების მქონე წევრთა ერთი მესამედი მაინც.
4. საქართველოს მეცნიერებათა ეროვნული აკადემიის საერთო კრება უფლებამოსილია, თუ მას ესწრება სიითი შემადგენოლობის ნახევარზე მეტი.
5. საქართველოს მეცნიერებათა ეროვნული აკადემიის საერთო კრებას იწვევს და თავმჯდომარეობს აკადემიის პრეზიდენტი, ხოლო მისი არყოფნის შემთხვევაში აკადემიის პრეზიდენტის მოვალეობის შემსრულებელი.
6. საქართველოს მეცნიერებათა ეროვნული აკადემიის საერთო კრება გადაწყვეტილებებს იღებს სიითი შემად­გენლობის უმრავლესობით, გარდა იმ შემთხვევისა, როდესაც საკითხი უნდა გადაწყდეს კვალიფიციური უმრავლესობით (სიითი შემადგენლობის არანაკლებ სამი მეხუთედისა).

თავი VI

საქართველოს მეცნიერებათა ეროვნული აკადემიის პრეზიდიუმი

1. საქართველოს მეცნიერებათა ეროვნული აკადემიის პრეზიდიუმი შედგება აკადემიის პრეზიდენტისაგან, აკადემიის ვიცე-პრეზიდენტისაგან, აკადემიის აკადემი­კოს-მდივნისაგან, განყოფილებათა აკადემიკოს-მდივნე­ბისაგან და აკადემიის საერთო კრების მიერ არჩეული სხვა წევრებისაგან, რომელთა რაოდენობა არ უნდა აღემა­ტებოდეს ექვსს.

აკადემიის პრეზიდიუმის სხვა წევრების შერჩევისა და არჩევის წესი რეგულირდება ამ წესდებით.

2. საქართველოს მეცნიერებათა ეროვნული აკადემიის პრეზიდიუმი ასრულებს აკადე­მიის საერთო კრების დადგენილებებს და აკადემიის საერთო კრებებს შორის პერი­ოდში ხელმძღვანელობს აკადემიის საქმიანობას.
3. საქართველოს მეცნიერებათა ეროვნული აკადემიის პრეზიდიუმი ანგარიშვალდე­ბულია აკადემიის საერთო კრების წინაშე.
4. აკადემიის პრეზიდიუმის წევრებს შორის მოვალე­ობებსა და ფუნქციებს აკადემიის პრეზიდიუმის წევ­რებთან შეთანხმებით ანაწილებს აკადემიის პრეზი­დენტი და ამტკიცებს აკადემიის პრეზიდიუმი.
5. საქართველოს მეცნიერებათა ეროვნული აკადემიის პრეზიდიუმთან შეიძლება არსებობდეს სამეცნიერო კომიტეტები, კომისიები და სამეცნიერო საზოგა­დოებები.
6. საქართველოს მეცნიერებათა ეროვნული აკადემიის პრეზიდიუმი:

ა) ამყარებს სამეცნიერო კონტაქტებს დარგობრივ მეცნიე­რებათა აკადემიებთან და უცხოეთის მეცნი­ერებათა აკადემიებთან, აგრეთვე სხვა სამეცნიერო დაწესებუ­ლებებთან;

ბ) იწვევს სამეცნიერო სესიებს, კონფერენციებს, თათბი­რებსა და სიმპოზიუმებს; ანიჭებს საქართველოს მეც­ნიერებათა ეროვნული აკადემიის სახელობით პრე­მიებს მნიშვნელოვანი მეცნიერული შრომებისათვის და გამო­გონებებისათვის, აგრეთვე საქართველოს მეცნიერებათა ეროვნული აკადემიის პრემიებს ახალ­გაზრდა მეცნი­ერთა და უმაღლესი სასწავლებლების სტუდენტთა საუკეთესო მეცნიერული ნაშრომე­ბისათვის;

გ) წარუდგენს საქართველოს მეცნიერებათა ეროვნული აკადემიის საქმიანობის წლიურ ანგარიშს აკადემიის საერთო კრებას განსახილველად და დასამტკი­ცებლად;

დ) საქართველოს მეცნიერებათა ეროვნული აკადემიის სამეცნიერო განყოფილებათა მიერ წარმოდგენილი და­სკვნების საფუძველზე შეფასებას აძლევს სა­ქართველოს უმაღლესი საგანმანათლებლო დაწესე­ბუ­ლებების, სამეც­ნიერო-კვლევითი ინსტი­ტუ­ტების სამეცნიერო საქმიანობის წლიურ ანგარიშებს და დასრულებულ სამეც­ნიერო-კვლევით სამუშაოებს. თავის მოსაზრებებს აცნობს ამ ორგანიზაციებს, სა­ქარ­თველოს განათლებისა და მეცნიერების სამინის­ტროს და მეცნიერების გან­ვითა­რების ფონდებს;

ე) ამტკიცებს აკადემიასთან არსებული სტრუქტურული ერთეულების დებულებებს;

ვ) საქართველოს მეცნიერებათა ეროვნული აკადემიის პრეზიდენტის წარდგინებით ამტკიცებს აკადემიას­თან არსებული სტრუქტურული ერთეულების ხელ­მძღვანე­ლებს;

ზ) ამტკიცებს აკადემიის პერიოდულ გამოცემათა სარე­დაქციო კოლეგიებისა და საბჭოების შემადგენ­ლობებსა და დებულებებს;

თ) ამტკიცებს გამოჩენილ მეცნიერთა აკადემიური სახე­ლო­ბითი პრემიების მინიჭების სანიმუშო დებუ­ლებას;

ი) ამტკიცებს სამეცნიერო განყოფილების საერთო კრე­ბის მიერ ფარული კენჭისყრით არჩეულ განყოფი­ლების სწავლულ მდივანს.

7. საქართველოს მეცნიერებათა ეროვნული აკადემიის პრეზიდიუმს ემსახურება ადმინისტრაციული აპარატი; ადმინისტრაციული აპარატის დებულებას და შინა­განაწესს ამტკიცებს აკადემიის პრეზიდიუმი.

თავი VII

საქართველოს მეცნიერებათა ეროვნული აკადემიის პრეზიდენტი

1. საქართველოს მეცნიერებათა ეროვნული აკადემიის პრეზიდენტი არის აკადემიის სრულუფლებიანი წარმო­მადგენელი როგორც ქვეყნის შიგნით, ისე მის ფარგლებს გარეთ. იგი პასუხს აგებს აკადემიის საქმიანობის წარმართვაზე. აკადემიის პრეზი­დენტი იმავდროულად არის აკადემიის პრეზიდიუმის თავმჯდომარე.
2. აკადემიის პრეზიდენტს აკადემიის ნამდვილ წევრთა­გან (აკადემიკოსთაგან) ირჩევს აკადემიის საერთო კრე­ბა, 5 წლის ვადით, ფარული კენჭისყრით, სიითი შე­მადგენ­ლობის უმრავლესობით. ერთი და იმავე პირის აკადემიის პრეზიდენტად არჩევა შეიძლება ზედიზედ მხოლოდ ორჯერ.
3. საქართველოს მეცნიერებათა ეროვნული აკადემიის პრეზიდენტის კანდიდატურის წამოყენების უფლება აქვთ აკადემიის პრეზიდიუმს, განყოფილებებს, აკადე­მიის წევრთა ჯგუფებსა და ცალკეულ წევრებს.
4. საქართველოს მეცნიერებათა ეროვნული აკადემიის პრეზიდენტი:

ა) წარუდგენს საერთო კრებას აკადემიის ვიცე-პრეზი­დენ­ტობის, აკადემიის აკადე­მიკოს-მდივნობის და პრეზი­დიუმის სხვა წევრობის კანდიდატებს;

ბ) იწვევს და თავმჯდომარეობს აკადემიის საერთო კრე­ბებსა და პრეზიდიუმის სხდომებს;

გ) განკარგავს აკადემიის ფინანსებს.

თავი VIII

საქართველოს მეცნიერებათა ეროვნული აკადემიის სტრუქტურა

1. აკადემიის სტრუქტურას განსაზღვრავს აკადემიის პრეზიდიუმი და ამტკიცებს აკა­დემიის საერთო კრება.
2. აკადემიის ძირითადი სტრუქტურული ერთეულია განყოფილება, რომელიც აერ­თიანებს შესაბამისი სამეცნიერო პროფილის აკადემიის ნამდვილ წევრებს (აკა­დემიკოსებს), აკადემიის წევრ-კორესპონდენტებს და აკადემიის სტიპენდიატებს. განყოფილებას ხელ­მძღვანელობს განყოფილების აკადემიკოს-მდივანი.
3. „მეცნიერების, ტექნოლოგიებისა და მათი განვითა­რების შესახებ” საქართველოს კანონის მე-10 მუხლის შესაბამისად, სამეცნიერო-კვლევითი დაწესებულების თხოვ­ნისა და საქართველოს მეცნიერებათა ეროვნული აკადემიის პრეზიდიუმის თანხმობის შემთხვევაში ამ სამეცნიერო დაწესებულების აკადემიის სტრუქტუ­რული ერთეულის ფორმით ჩამოყალიბება შესაძლებე­ლია, თუ საქართველოს ეკონომიკისა და მდგრადი გან­ვითარების სამინისტროს მიერ მიღებულია გადაწყვე­ტილება მისთვის ქონების გადაცემის შესახებ.
4. აკადემიის ძირითადი  სტრუქტურული ერთეულის – სამეცნიერო განყოფილების,  აკადემიის სამეცნიერო და სხვა სტრუქტურული ერთეულების უფლებამოსი­ლე­ბანი, აგრეთვე მათი ხელმძღვანელების არჩევისა და დანიშვნის წესი განისაზღვრება ამ წესდებით, აკადე­მიის პრეზიდიუმის მიერ დამტკიცებული შესაბამისი დებულებებითა და აკადემიის შინაგანაწესით.

აკადემიის სამეცნიერო სტრუქტურული ერთეულებია –  ქართული ენციკლოპედიის ირაკლი აბაშიძის სახე­ლობის მთავარი სამეცნიერო რედაქცია; აკად. გიორგი წერეთლის სახელობის „ვეფხისტყაოსნის“ აკადემიური გამოცემისა და „ქართული ენის თესაურუსის“ კომი­ტეტი; აჭარის ავტონომიური რესპუბლიკის რეგიო­ნული სამეცნიერო ცენტრი.

თავი IX

საქართველოს მეცნიერებათა ეროვნული აკადემიის განყოფილება

1. საქართველოს მეცნიერებათა ეროვნული აკადემიის ძირითადი სამეცნიერო-ორგანიზაციული ერთეულია განყოფილება, რომელსაც ხელმძღვანელობს საქართვე­ლოს მეცნიერებათა ეროვნული აკადემიის განყოფი­ლების აკადემიკოს-მდივანი, ხოლო მისი არყოფნის შემთხვევაში – მოვალეობის შემსრულებელი, იმავე განყოფილების წევრი.

განყოფილება საქმიანობას წარმართავს აკადემიის პრეზი­დიუმის მიერ დამტკიცებული დებულებით.

2. განყოფილების უმაღლესი ორგანოა განყოფილების საერთო კრება, რომელიც უფლებამოსილია, თუ მას ესწრება განყოფილების წევრთა სიითი შემადგენლობის ნახევარზე მეტი, ხოლო აკადემიის ნამდვილი წევრის (აკადემიკოსის) არჩევნებისას განყოფილების საერთო კრება უფლებამოსილია, თუ მას ესწრება განყოფილების ნამდვილ წევრთა (აკადემიკოსთა) ნახევარზე მეტი.
3. განყოფილების საერთო კრება ფარული კენჭისყრით, აკადემიის ნამდვილ წევრთაგან შეარჩევს განყოფილე­ბის აკადემიკოს-მდივნის კანდიდატურას.  შერჩეულად ჩაითვლება ის პირი, რომელმაც ყველაზე მეტი ხმა დააგროვა, მაგრამ არანაკლებ ხმის უფლების მქონე წევრთა სიითი შემადგენლობის  ნახევარზე მეტი ხმა.

განყოფილების საერთო კრებაზე აკადემიკოს-მდივნის კანდიდატურის შერჩევისას ხმის უფლების მქონე წევრებს უფლება აქვთ ხმა მისცენ ერთ ან რამდენიმე კანდიდატს.

განყოფილების საერთო კრება ფარული კენჭისყრით, ირჩევს განყოფილების სწავლულ მდივანს  ხუთი წლით ვადით, არჩეულად ჩაითვლება ის პირი, რომელმაც დააგროვა  ხმის უფლების მქონე წევრთა სიითი შემადგენლობის  ნახევარზე მეტი ხმა (უმრავლესობა).

განყოფილების საერთო კრებაზე, განყოფილების სწავ­ლული მდივნის არჩევისას ხმის უფლების მქონე  წევრი სარგებლობს ერთი ხმით.

4. განყოფილება აყალიბებს მეცნიერების და ტექნოლო­გიების დარგობრივ კომისიებს (შემდგომში დარგობრივ კომისიებს) და განყოფილების საერთო კრება ფარული კენჭისყრით ირჩევს დარგობრივი კომისიების თავმჯ­დო­მარეებს აკადემიის წევრ­თაგან.
5. განყოფილება:

ა) ისმენს და ამტკიცებს განყოფილების მუშაობის ან­გარიშს;

ბ) იხილავს მეცნიერების შესაბამისი დარგების პრიორი­ტეტული მიმართულებების განვითარების სა­კითხებს და სათანადო წინადადებებს წარუდგენს აკადემიის პრეზიდიუმს;

გ) ექსპერტიზას უწევს საქართველოს სამეცნიერო და საგან­მანათლებლო დაწესებუ­ლებების საქმიანობის წლიურ სამეცნიერო ანგარიშებს და შესაბამის დასკვნას წარუდგენს აკადემიის პრეზიდიუმს;

დ) კოორდინაციას უწევს შესაბამისი სამეცნიერო დაწესე­ბულებების საქმიანობას;

ე) აყალიბებს საექსპერტო კომისიებს საქართველოს მეც­ნიერებათა ეროვნული აკადე­მიის სახელობითი პრე­მიების მისანიჭებლად;

ვ) წარუდგენს საქართველოს მეცნიერებათა ეროვნული აკადემიის პრეზიდიუმს წინა­დადებებს სახელობითი პრემიების მინიჭების თაობაზე. აკადემიის პრეზიდი­უმის სათანადო გადაწყვეტილების შემთხვევაში აყა­ლიბებს საექსპერტო კომისიებს შემო­სული განცხადე­ბების განსახილველად;

ზ) კოორდინირებას უწევს გამოჩენილ მეცნიერთა სახე­ლობითი პრემიების მისა­ნიჭებლად შექმნილი საექს­პერტო კომისიების საქმიანობას, იხილავს მათი მუშა­ობის შედეგებს და განყოფილების საერთო კრებაზე განხილულ მასალებს დასამ­ტკი­ცებლად წარუდგენს აკადემიის პრეზიდიუმს;

თ) იხილავს სამეცნიერო სესიების, კონფერენციებისა და თათბირების მოწყობის საკითხებს და სათანადო წინადადებებს წარუდგენს აკადემიის პრეზიდიუმს;

ი) შეარჩევს საქართველოს მეცნიერებათა ეროვნული აკადე­მიის ნამდვილი წევრობის (აკადემიკოსობის), წევრ-კორესპონდენტობისა და სტიპენდიატობის კან­დიდატებს.

6. საქართველოს მეცნიერებათა ეროვნული აკადემიის განყოფილების აკადემიკოს-მდივანი:

ა) ხელმძღვანელობს განყოფილებას და არის განყოფი­ლების სრულუფლებიანი წარმომადგენელი აკადე­მიის პრეზიდიუმში;

ბ) იწვევს და თავმჯდომარეობს განყოფილების საერთო კრებას.

7. განყოფილების დარგობრივი კომისიების  მიზნებია:

ა) მეცნიერებისა და ტექნოლოგიების სფეროში მოპოვე­ბული საერთაშორისო დონის შედეგების გაანალი­ზება, რეკომენდაციების შემუშავება და მათი წარ­დგენა განყო­ფილების სხდომაზე განსახილველად;

ბ) საქართველოში ჩატარებული სამეცნიერო-ტექნოლო­გიური კვლევების წლიური ანგარიშებისა და ცალკე­ული სამეცნიერო ნაშრომების ექსპერტიზა და შესაბა­მისი დასკვნის წარდგენა განყოფილების სხდომაზე განსახილველად;

გ) დარგების მიხედვით წლის საუკეთესო კვლევითი ჯგუ­ფების გამოვლენა და სათა­ნადო წინადადებების წარდგენა განყოფილების სხდომაზე განსახილვე­ლად; საუ­კეთესო კვლევითი კოლექტივის შერჩევა ხდება განყოფილების მიერ შემუ­შავებული კრიტე­რიუმების საფუძველზე.

 

თავი X

საქართველოს მეცნიერებათა ეროვნული აკადემიის ნამდვილი წევრის (აკა­დემიკოსის),
წევრ-კორესპონდენტის, საპატიო აკადემიკოსის, აკადემიის უცხო­ელი წევრისა და აკადემიის სტიპენდიატის არჩევა

 

1. 1. საქართველოს მეცნიერებათა ეროვნული აკადემიის ნამდვილი წევრის, (აკადე­მიკოსის), აკადემიის წევრ-კორესპონდენტისა და სტიპენდიატის არჩევნები ტარ­დება საქართველოს მეცნიერებათა ეროვნული აკა­დემიის შესახებ საქარ­თველოს კანონითა და ამ წესდებით განსაზღვრული წესით.
2. საქართველოს მეცნიერებათა ეროვნული აკადემიის ნამდვილ წევრთა (აკადემიკოსთა), აკადემიის წევრ-კორესპონდენტთა და აკადემიის სტიპენდიატთა არჩევნები ცხადდება არსებულ ვაკანსიებზე, პრეზი­დი­უმის მიერ დამტკიცებული სპეციალობების მიხედვით.
3. აკადემიკოსობის, წევრ-კორესპონდენტობისა და სტი­პენდიატობის კანდიდატთა საბუთების მიღების ვადები, ასევე კანდიდატთა შერჩევისა და არჩევის თარიღები განისაზღვრება საქართველოს მეცნიერე­ბათა ეროვნული აკადემიის პრეზიდიუმის მიერ ყოველი არჩევნების წინ.

აკადემიკოსობის, წევრ-კორესპონდენტობისა და სტი­პენ­დია­ტობის კანდიდატთა შესახებ წარმოსადგენი მასა­ლების ნუსხა (მათ შორის: მეცნიერებათა დოქტო­რის, აკადემიური დოქტორის ან მასთან გათანაბ­რებული სამეცნიერო ხარისხის დამადასტურებელი დიპლომი და სხვა) განისაზღვრება საქართველოს მეცნიერებათა ეროვნული აკადემიის პრეზიდიუმის მიერ მიღებული დადგენილებით და მოქმედებს ყველა შესაბამისი არჩევნებისთვის.

4. საქართველოს მეცნიერებათა ეროვნული აკადემიის განცხადება აკადე­მიის ნამდვილ წევრთა (აკადემიკოს­თა) და აკადემიის წევრ-კორესპონდენტთა არჩევ­ნების ჩატარების შესახებ, ქვეყნდება პრესაში და განთავს­დება აკადემიის ვებ-გვერდზე (science.org.ge), არჩევნებამდე არანაკლებ სამი თვით ადრე.

საქართველოს მეცნიერებათა ეროვნული აკადემიის გან­ცხადება სტიპენ­დიატთა არჩევნების ჩატარების შესა­ხებ ქვეყნდება პრესაში და განთავსდება აკადემიის ვებ-გვერდზე (science.org.ge), არჩევნებამდე  არანაკ­ლებ ორი  თვით ადრე.

5. საქართველოს მეცნიერებათა ეროვნული აკადემიის ნამდვილი წევრობის (აკადემიკოსობის) კანდიდატთა წარდგენის უფლება აქვს: საქართველოს მეცნიერებათა ეროვნული აკადემიის ნამდვილ წევრს (აკადემიკოსს); ავტორიზებულ საჯარო და კერძო უმაღლეს საგან­მანათლებლო დაწესებულებას (აკადემიური საბჭოს გადაწყვეტილებით); საჯარო სამართლის იურიდიულ პირს – სამეცნიერო-კვლე­ვით დაწესებულებას (სამეც­ნიე­რო საბჭოს გა­დაწყვეტილებით).

საქართველოს მეცნიერებათა ეროვნული აკადემიის წევრ-კორესპონდენტობისა და სტიპენდიატობის კანდი­დატ­თა წარდგენის უფლება აქვს: საქართველოს მეც­ნიერებათა ეროვნული აკადემიის წევრს; ავტორი­ზებულ საჯარო და კერძო უმაღლეს საგანმანათ­ლებლო დაწესებულებას (აკადემიური საბჭოს გადაწყ­ვე­ტილებით);  საჯარო სამართლის იურიდიულ პირს  სამეცნიერო-კვლევით დაწესებულებას (სამეცნიერო საბჭოს გადაწყვეტილებით).

6. აკადემიკოსობის, წევრ-კორესპონდენტობი, სტიპენ­დია­ტობის კანდიდა­ტის საბუთების მიღებას ახორ­ციელებს აკადემიის ადამიანური რესურსების მარ­თვისა და სპეციალურ დავალებათა დეპარტამენტი (შემ­დგომში – ადამიანური რესურსების მართვის დეპარ­ტამენტი), ხოლო რეგისტრირებას – აკადემიის კანცე­ლარია.

მიღებულ საბუთებში ხარვეზის აღმოჩენის შემთხვე­ვაში, აკადემიის ადა­მიანური რესურსების მართვის დეპარ­ტამენტი წერილობით (ელ. ფოსტა) ატყო­ბინებს წარ­მომ­დგენს აღნიშნულის შესახებ და ხარვეზის აღმოსაფხვრელად განუ­საზღვრავს სამ სამუშაო დღეს. თუ კანდიდატი დადგენილ ვადაში ვერ შეძლებს ხარვეზის აღმოფხვრას, მისი არჩევის საკითხი აღარ განიხილება.

7. არჩევნებში მონაწილეთა საბუთების მიღების ვადის დამთავრებიდან 10 დღის განმავლობაში აკადემიის ადამიანური რესურსების მართვის დეპარტამენტი პრეზიდიუმს მოახსენებს ინფორმაციას, წარმოდგენილ კანდიდატთა შესახებ, ხოლო რეგისტრირებულ კანდი­დატ­თა საბუთებს წარუდგენს საქართველოს მეცნიე­რებათა ეროვნული აკადემიის შესაბამის სამეცნიერო განყოფილებებს განსახილველად.
8. რეგისტრირებულ კანდიდატთა სამეცნიერო მოღვა­წეო­ბის ამსახველი ძირითადი მასა­­ლე­ბი (CV) და პუბ­ლიკაციათა სია განთავსდება აკადემიის ვებგვერდზე (science.org.ge).
9. 9. საქართველოს მეცნიერებათა ეროვნული აკადე­მიის ნამდვილი წევრობის (აკადემიკოსობის), წევრ-კორეს­პონდენტობისა და სტიპენდიატობის რეგის­ტრირე­ბულ კანდი­დატთა სია ქვეყნდება პრესაში და განთავს­დება აკადემიის ვებ-გვერდზე (science. org.ge) არჩევნე­ბის ჩატარებამდე, არანაკლებ ერთი თვით ადრე.

აკადემიკოსობის, წევრ-კორესპონდენტობის, სტიპენ­დია­­ტო­ბის კანდიდატს უფლება აქვს მოხსნას თავისი კანდიდატურა ნებისმიერ დროს, წერილობითი გან­ცხადების საფუძველზე.

10. განყოფილების საერთო კრებაზე აკადემიკოსობის კან­დიდატთა შერჩევისას, ასევე, აკადემიის საერთო კრებაზე – არჩევისას, ხმის უფლებით სარგებლობენ საქართველოს მეცნიერებათა ეროვნული აკადემიის ნამდვილი წევრები (აკადემიკოსები).

განყოფილების საერთო კრებაზე აკადემიის წევრ-კორესპონდენტობისა და სტიპენდიატობის კან­დიდატ­თა შერჩევისას, ასევე, აკადემიის საერთო კრებაზე – არჩევისას, ხმის უფლებით სარგებლობენ საქართველოს მეცნიერებათა ეროვნული აკადემიის ნამდვილი წევრები (აკადემიკოსები) და წევრ-კორესპონდენტები.

შენიშვნა: თანასწორობისა და მიუკერძოებლობის პრინ­ციპებიდან გამომდინარე, კენჭისყრაში მონაწილეობის უფლება არ აქვთ იმ აკადემიკოსებსა და წევრ-კორესპონდენტებს, რომლებიც არიან კანდიდატის ოჯა­ხის წევრები ან ახლო ნათესავები (ასეთ შემ­თხვევაში, აკადემიის წევრმა წერილობით უნდა აცნო­ბოს შესაბამის განყოფილებას თვითაცილების შესახებ).

11. განყოფილებისა და აკადემიის საერთო კრებაზე აკადემიკოსობის, წევრ-კორესპონდენტობისა და სტიპენდიატობის კანდიდატთა შერჩევა/არჩვა ხდება ფარული კენჭისყრით.

აკადემიკოსებსა და წევრ-კორესპონდენტებს უფლება აქვთ აკადემიკოსობის, წევრ-კორესპონდენტობისა და სტი­პენდიატობის კანდიდატთა  შერჩევისას   განყოფი­ლების საერთო კრებაზე  ხმა მისცენ ერთ ან რამდენიმე კანდიდატს, ხოლო აკადემიის საერთო კრებაზე არჩევისას – მხოლოდ  ერთ კანდიდატს.

12.აკადემიის ნამდვილ წევრთა (აკადემიკოსთა), წევრ-კორესპონდენტთა და სტიპენ­დიატთა არჩევნებში მონა­წილე კანდიდატთა სიის გამოქვეყნებიდან ათი დღის ვადაში აკადემიის პრეზიდიუმი ამტკიცებს განყოფი­ლებათა საექს­პერტო კომისიებს დარგების მიხედვით.

13. საექსპერტო კომისია პრეზიდიუმის მიერ განსაზ­ღვრულ ვადებში განიხილავს რეგისტრირებული კანდიდატების შესახებ, შესაბამისი განყოფილების მიერ წარმოდგენილ მასალებს და ატარებს ფარულ კენჭისყრას, გამოცხადებულ ვაკან­სიაზე კანდიდატისთვის  რეკომენდაციის მისა­ცემად.

14.საექსპერტო კომისიის კენჭისყრის შედეგები უნდა ეცნობოს განყოფი­ლების საერთო კრებას აკადემიკო­სობის, წევრ-კორესპონდენტობისა  და სტიპენ­დია­ტობის კანდიდატთა შერჩევის წინ.

15. აკადემიაში მიმდინარე არჩევნებისას, თუ განყოფი­ლებაში ხმის უფლების მქონე წევრთა რაოდენობა შვიდზე ნაკლებია – ამ განყოფილებაში პრეზიდიუმის დადგენილებით, ტარდება ორი განყოფილების გაერთიანებული კრება.
16. არჩევნებამდე აკადემიის სამეცნიერო განყოფილება მოისმენს აკადე­მიკოსობის, წევრ-კორესპონდენ­ტო­ბისა და სტიპენდიატობის კანდიდატთა მოხსე­ნებებს სამეცნიერო მოღვაწეობის შესახებ. აკადემიის წევრებს (და სხვა დაინ­ტერესებულ პირებს) უფლება აქვთ დაესწრონ განყოფილებაში მიმდინარე მოს­მენებს.
17. განყოფილების საერთო კრება უფლებამოსილია მოა­წყოს აკადემიის ნამდვილი წევრობის (აკადემიკო­სო­ბის) კანდიდატთა შერჩევა, თუ მას ესწრება განყო­ფილების ან გაერთიანების შემთხვევაში, განყოფი­ლებების ნამდვილ წევრთა (აკადემიკოსთა) სიითი შემადგენ­ლობის ნახევარზე მეტი.

განყოფილების საერთო კრება უფლებამოსილია ჩაატა­როს აკადემიის წევრ-კორესპონდენტობისა და სტი­პენდია­ტობის კანდიდატთა შერჩევა, თუ მას ესწრება გან­ყოფილების ან, გაერთიანების შემთხვევაში,  განყო­ფილებების ნამდვილ წევრთა (აკადემიკოსთა) და წევრ-კორესპონდენტთა სიითი შემადგენლობის ნა­ხევარზე მეტი.

ხმის უფლების მქონე იმ წევრთათვის, ვინც კანდი­დატის არჩევას ბინაზე უყრის კენჭს, ასევე, უცხოეთში ან, საქართველოს რომელიმე რეგიონში მყოფი აკა­დემიის წევრებისთვის დასაშვებია სხდომის მუშაო­ბაში (და არა – ფარულ კენჭისყრაში) დისტანციური მონაწი­ლე­ობა, თანამედროვე საინფორმაციო ტექნოლოგიის გამოყენებით.

18. განყოფილების საერთო კრებაზე აკადემიკოსობის, წევრ-კორესპონდენ­ტობის ან

სტიპენდიატობის კანდიდატად შერჩეულად ჩაითვლე­ბა ის პირი, რომელიც კენჭისყრისას დააგროვებს ხმის უფლების მქონე წევრთა სიითი შემადგენლობის  ნა­ხევარზე მეტ ხმას. თუ აკადემიკოსობის, წევრ-კო­რესპონდენტობის ან სტიპენდიატობის ორმა ან მეტმა კან­დიდატმა მიიღო ხმის უფლების მქონე წევრთა სიითი შემადგენლობის ნახევარზე მეტი ხმა, შერ­ჩეულად ჩაითვლება ის პირი, რომელმაც ყველაზე მეტი ხმა დააგროვა.

19. განყოფილების საერთო კრებაზე კენჭისყრის პირველ ტურში თუ ვერ შეირჩა კანდიდატი და აკადემიკოსობის, წევრ-კორესპონდენტობის ან სტიპენდიატობის ერთმა ან რამდენიმე კანდიდატმა დააგროვა სიითი შემადგენლობის ნახევარზე ნაკლები, მაგრამ 1/3-ზე მეტი ხმა, ამ კანდი­დატ(ებ)ისთვის ტარდება კენჭისყრის მეორე ტური; თუ მათ მეორე ტურის შემდეგაც ვერ მიიღეს შერჩევისათვის საჭირო ხმათა რაოდენობა ვაკანსია ჩაითვლება გაუქმებულად.
20. თუ კენჭისყრის პირველ ტურში ერთ ვაკანსიაზე აკა­დემიკოსობის, წევრ-კორესპონდენტობის ან სტიპენ­დია­ტობის ორმა ან მეტმა კანდიდატმა მიიღო გამს­ვლელი ხმების (სიითი შემადგენლობის ნახევარზე მეტი ხმა) თანაბარი რაოდენობა, მათთვის ჩატარდება კენჭის­ყრის მეორე ტური, თუ მეორე ტურში ვერცერთ­მა კან­დიდატმა ვერ მიიღო შერჩევისთვის საჭირო გამსვლელი ხმები, ვაკანსია ჩაითვლება გაუქმე­ბულად.

იმ შემთხვევაში, თუ კანდიდატებმა მეორე ტურში კვლავ მიიღეს გამსვლელი ხმების (სიითი შემადგენლობის ნახევარზე მეტი ხმა)  თანაბარი რაო­დენობა, ჩატარდება კენჭისყრის მესამე ტური. თუ მესამე ტურის შემდეგ – ერთ ვაკანსიაზე შერჩეულია აკადემიკოსობის, წევრ-კორესპონდენტობის ან სტიპენ­დიატობის ორი ან მეტი კანდიდატი, გამსვლელი ხმების თანაბარი  რაოდენო­ბით, მათი არჩევის საკითხს გადაწყვეტს აკადემიის საერთო კრება. საერთო კრებაზე არჩეულად ჩაითვ­ლება აკადემიკოსობის, წევრ-კორესპონდენ­ტობის ან სტიპენ­დია­ტობის ის კანდიდატი, რომელიც მიიღებს ხმის უფლების მქონე წევრთა სიითი შემადგენლობის ხმების მეტ რაოდენობას, მაგრამ არანაკლებ ხმის უფლების მქონე წევრთა სიითი შემადგენლობის  ნახევარზე მეტ ხმას. აკადემიის საერთო კრებაზე კანდიდატთა მიერ გამსვლელი ხმების თანაბარი რაოდენობის მიღების შემთხვევაში ვაკანსია ჩაითვ­ლება გაუქმებულად.

21. საქართველოს მეცნიერებათა ეროვნული აკადემიის ნამდვილ წევრს (აკადემიკოსს), წევრ-კორესპონდენტს ან აკადემიის სტიპენდიატს, რომელიც შეირჩევა სამეც­ნიერო განყოფილებათა საერთო კრების მიერ, ირჩევს აკადემიის საერთო კრება, ფარული კენჭისყრით.

ხმის უფლების მქონე იმ წევრთათვის, ვინც კანდიდა­ტის არჩევას ბინაზე უყრის კენჭს, ასევე, უცხოეთში ან საქართველოს რომელიმე რეგიონში მყოფი აკადემიის წევრებისთვის დასაშვებია სხდომის მუშაობაში (გარ­და ფარული კენჭისყრისა) დისტანციური მონაწი­ლეობა თანამედროვე საინფორმაციო ტექნოლოგიის გამო­ყენებით.

22. აკადემიკოსად, წევრ-კორესპონდენტად, ან სტიპენდია­ტად არჩეულად ჩაითვლება

ის კანდიდატი, რომელიც მიიღებს ხმის უფლების მქონე წევრთა ხმების მეტ რაოდენობას,

მაგრამ არანაკლებ ხმის უფლების მქონე წევრთა სიითი შემადგენლობის  ნახევარზე მეტ ხმას.

23. აკადემიის განყოფილების საერთო კრებაზე შერჩევისას და აკადემიის საერთო კრებაზე აკადემიკოსთა არჩევისას აკადემიის ნამდვილ წევრთაგან ირჩევენ ხმის დამთვლელ კომისიებს.

     აკადემიის განყოფილების საერთო კრებაზე შერჩევისას და აკადემიის საერთო კრებაზე წევრ-კორესპონდენტთა და სტიპენდიატთა არჩევისას აკადემიის ნამდვილ წევრთაგან და წევრ- კორესპონდენტთაგან ირჩევენ ხმის დამთვლელ კომისიებს.

24. აკადემიის განყოფილებათა საერთო კრებებსა და აკადემიის საერთო კრებაზე ფარული კენჭისყრის ბიულეტენებში კანდიდატის გვარის გასწვრივ არის სიტყვები „თანახმა ვარ“ და „წინააღმდეგი ვარ“, რომელთაგან კენჭისყრაში მონაწილე ხაზს გადაუსვამს ერთ-ერთს. ბიულეტენი ყოველგვარი აღნიშვნის გარეშე და ბიულეტენი, რომელშიც წაშლილია ან დატო­ვებულია ორივე სიტყვა „თანახმა ვარ“ და „წინააღმდეგი ვარ“ კონკრეტული კანდიდატის მი­მართ ჩაითვლება გაუქმებულად.
25. განყოფილებისა და აკადემიის საერთო კრებაზე საარჩევნო ბიულეტენის შევსებისას დაუშვებელია სხვა პირის დასწრება გარდა იმ შემთხვევისა, როცა ამომრჩეველს არ შეუძლია დამოუკიდებლად შეავსოს საარჩევნო ბიულეტენი, ამ დროს მას უფლება აქვს დასახმარებლად მოიწვიოს ნებისმიერი პირი, მაგრამ არა ხმის დამთვლელი კომისიის წევრი და აკა­დემიკოსობის, წევრ-კორესპონ­დენტობის, სტიპენდია­ტო­ბის კანდიდატი.
26. განყოფილებათა საერთო კრებებზე და აკადემიის საერთო კრებაზე ფარული კენჭისყრის ბიულეტენის მიღება დასტურდება ბიულეტენის მიღების სიაში ხელმოწერით.
27. თუ კენჭისყრაში მონაწილეს უნებურად გაუფუჭდა საარჩევნო ბიულეტენი, იგი აბარებს მას ხმის დამ­თვლელი კომისიის თავმჯდომარეს, რომელიც ბიუ­ლე­ტენს დააწერს „გაფუჭებულია“, ჩამოაჭრის კუთხეს და ცალკე შეინახავს, ხოლო ამომრ­ჩეველს გადასცემს ახალ ბიულეტენს.
28. ფარული კენჭისყრა ტარდება აკადემიის შენობაში, არჩევნებისათვის განკუთვნილ ოთახში, სადაც დგას დალუქული ყუთი და იმყოფებიან მხოლოდ ხმის დამთვლელი კომისიის წევრები.
29. ბინაზე ხმის მიცემის აუცილებლობის შემთხვევაში, ხმის დამთვლელი კომისია გამოყოფს კომისიის წევრთაგან ჯგუფს, რომელიც უზრუნველყოფს ბინაზე კენჭისყრას. ბინიდან მოტანილი კენჭისყრის ყუთი იხსნება ძირითადი კენჭისყრის ყუთთან ერთად და მიმდინარეობს ხმების საერთო დათვლა.
30. განყოფილების ხმის დამთვლელი კომისიის ოქმებს ამტკიცებს განყოფილების საერთო კრება ხმათა უბრალო უმრავლესობით.
31. აკადემიის საერთო კრების ხმის დამთვლელი კომისიის ოქმებს ამტკიცებს აკადემიის საერთო კრება ხმათა უბრალო უმრავლესობით.
32. ხმის დამთვლელი კომისიის ოქმები, ფარული კენჭის­ყრის ბიულეტენებთან ერთად ინახება დალუ­ქული კონვერტით საქართველოს მეცნიერებათა ეროვნულ აკადე­მიაში.
33. არჩევნების შედეგები ქვეყნდება პრესაში და გან­თავსდება აკადემიის ვებგვერდზე (science.org.ge).
34. 34. არჩეული აკადემიკოსი, წევრ-კორესპონდენტი არის შესაბამისი განყო­ფილების წევრი აკადემიის საერთო კრების მიერ მისი არჩევის დღიდან და სარგებლობს მოქმედი კანონმდებლობითა და აკადემიის წესდებით გათვალისწი­ნებული უფლებებით.
35. არჩეული სტიპენდიატი ითვლება შესაბამისი განყოფი­ლების სტიპენდიატად აკა­დემიის საერთო კრების მიერ მისი არჩევის დღიდან და სარგებლობს მოქმედი კანონ­მდებლობითა და აკადემიის წესდებით გათვალის­წინებული უფლებებით.
36. საპატიო აკადემიკოსად და აკადემიის უცხოელ წევრად ასარჩევ კანდიდატებს შესაბამისი პროფილის განყო­ფი­ლების რეკომენდაციით, პრეზიდიუმზე განხილვის შემდეგ საერთო კრების წინაშე წარადგენს აკადემიის პრეზიდენტი.
37. საპატიო აკადემიკოსს და აკადემიის უცხოელ წევრს საქართველოს მეცნიერებათა ეროვნული აკადემიის საერთო კრება ირჩევს ღია კენჭისყრით.

 

თავი XI

საქართველოს მეცნიერებათა ეროვნული აკადემიის ნამდვილი წევრის (აკადემიკოსის) და წევრ–კორესპონდენტის სტატუსი

1. საქართველოს მეცნიერებათა ეროვნული აკადემიის აკადემიკოსი და წევრ-კორეს­პონდენტი შეიძლება ხელ­მძღვანელობდეს უმნიშვნელოვანესი მეცნიერული პრო­ბ­ლემის კვლევას ან მონაწილეობდეს მის შესრულებაში.
2. საქართველოს მეცნიერებათა ეროვნული აკადემიის აკა­დემიკოსები და წევრ-კორეს­პონდენტები არიან საქარ­თველოს მეცნიერებათა ეროვნული აკადემიის ერთ-ერ­თი განყოფილების წევრები; მათ შეუძლიათ გადავიდ­ნენ ერთი განყოფილებიდან მეო­რეში იმ შემთხვევაში, თუ ამაზე თანხმობას განაცხადებს მეორე განყოფი­ლების წევრთა სიითი შემადგენლობის უმრავლესობა.
3. ერთ განყოფილებაში შემავალ აკადემიკოსსა თუ წევრ-კორესპონდენტს, მეორე განყოფილების წევრთა სიითი შემადგენლობის უმრავლესობის თანხმობით, შეუძლია მონაწილეობა მიიღოს მეორე განყოფილების მუშაობაში და ისარგებლოს ამ განყო­ფილების წევრის ყველა უფლებით, გარდა საქართველოს მეცნიერებათა ეროვ­ნული აკადემიის აკადემიკოსთა და სტიპენდიატთა შერჩევისას ხმის უფლებით.
4. აკადემიის წევრს უფლება აქვს საქართველოს მეცნიერე­ბათა ეროვნული აკადემიის პრეზიდიუმში და იმ განყო­ფილებაში, რომელშიც იგი შედის, განსახილ­ველად შეიტანოს სამეცნიერო და სამეცნიერო-საორ­განიზაციო საკითხები, აგრეთვე გამოი­ტანოს ასეთი საკითხები აკადემიის საერთო კრებაზე განსახილ­ველად.
5. საქართველოს მეცნიერებათა ეროვნული აკადემიის წევრი, დარგობრივ კომისიაზე განხილვის შემდეგ, მეცნიერებათა ეროვნული აკადემიის შესაბამის განყო­ფილებას ყოველწლიურად წარუდგენს ანგარიშს სამეცნიერო საქმიანობის შესახებ.

თავი XII

საქართველოს მეცნიერებათა ეროვნული აკადემიის ნამდვილი წევრის (აკადემიკოსის), აკადემიის წევრ – კორესპონდენტისა და აკადემიის სტიპენდიატის ანაზღაურება

1. აკადემიის ნამდვილ წევრს (აკადემიკოსს) ენიშნება ანაზღაურება მთელი სიცოცხლის განმავლობაში თვეში არანაკლებ 2 000 ლარის ოდენობით.
2. აკადემიის წევრ-კორესპონდენტს ენიშნება ანაზღაუ­რება მთელი სიცოცხლის განმავლობაში თვეში არა­ნაკლებ 1 250 ლარის ოდენობით.
3. აკადემიის სტიპენდიატს ენიშნება სტიპენდია თვეში არანაკლებ 1 250 ლარის ოდენობით.
4. ამ თავის პირველი − მე-3 მუხლებით გათვალისწი­ნებული ანაზღაურებისათვის საჭირო თანხები საქართ­ვე­ლოს სახელმწიფო ბიუჯეტიდან გაიცემა, მათი სხვა მიზნით გამოყენება დაუშვებელია.
5. აკადემიის ნამდვილ წევრს (აკადემიკოსს) და აკადემიის წევრ-კორესპონდენტს ამ თავის პირველი და მე-2 მუხლებით გათვალისწინებული ანაზღაურება შეუწყ­დე­ბათ საქართველოს მოქალაქეობიდან გასვლის ან საქართველოს მოქალაქეობის დაკარგვის შემთხვევაში.
6. აკადემიის სტიპენდიატს ამ თავის მე-3 მუხლით გათვალისწინებული სტიპენდია შეუწყდება საქართვე­ლოს მოქალაქეობიდან გასვლის, საქართველოს მოქა­ლა­ქეობის დაკარგვის ან საქართველოში სამეცნიერო მოღვაწეობის შეწყვეტის შემთხვევაში.
7. ამ თავის პირველი და მე-2 მუხლებით გათვალის­წი­ნებული ანაზღაურება არის აკადემიის ნამდვილი წევ­რის (აკადემიკოსის) და აკადემიის წევრ-კორესპონ­დენ­ტის სამეცნიერო სტატუსების შესაბამისი ანაზღაურება.

 

თავი XIII

საქართველოს მეცნიერებათა ეროვნული აკადემიის ქონება

საქართველოს მეცნიერებათა ეროვნული აკადემია და­სახული მიზნებისა და დაკის­რებული ფუნქციების გან­სახორციელებლად უსასყიდლო უზუფრუქტის უფლებით სარგებლობს შესაბამისი ქონებით, რომელიც მას გად­მოცემული აქვს საქართველოს ეკონომიკისა და მდგრადი განვითარების სამინისტროს მიერ საქართველოს კანონ­მდებლობით დადგენილი წესით.

თავი XIV

საქართველოს მეცნიერებათა ეროვნული აკადემიის დაფინანსება

1. საქართველოს მეცნიერებათა ეროვნული აკადემიის დაფინანსების ძირითადი წყა­როა საქართველოს სახელ­მწიფო ბიუჯეტი. აკადემიისათვის გამოყოფილი სახსრები ცალკე აისახება კანონში „საქართველოს შესაბამისი წლის სახელმწიფო ბიუჯეტის შესახებ“.
2. საქართველოს მეცნიერებათა ეროვნული აკადემიის დაფინანსების დამატებითი წყაროებია:

ა) სამეცნიერო კვლევების მხარდამჭერი სახელმწიფო და კერძო, მათ შორის, საერთაშორისო და უცხო ქვეყნების ფონდები;

ბ) გრანტები და ხელშეკრულებების შესრულებით მიღებული შემოსავლები;

გ) სამეცნიერო-საგამომცემლო საქმიანობის რეალიზა­ცი­იდან შემოსავლები (მათ შორის, სახელმწიფო ბიუჯეტიდან დაფინანსებული);

დ) საქართველოს კანონმდებლობის საფუძველზე ეკო­ნომიკური საქმიანობიდან მიღებული ფულადი სახსრები;

ე) აკადემიის ამოცანებთან დაკავშირებული და საქარ­თველოს კანონმდებლობით დადგენილი წესით გან­ხორციელებული სხვა, მათ შორის, დამხმარე ეკონომიკური საქმიანობა.

თავი XV

საქართველოს მეცნიერებათა ეროვნული აკადემიის საქმიანობის სახელმწიფო კონტროლი

აკადემიის საქმიანობის სახელმწიფო კონტროლს ახორ­ციელებს საქართველოს მთავ­რობა, საქართველოს კანონ­მდებლობით დადგენილი წესით.

თავი XVI

საქართველოს მეცნიერებათა ეროვნული აკადემიის წესდების შეცვლის წესი

საქართველოს მეცნიერებათა ეროვნული აკადემიის წეს­დების შეცვლა ხდება საქარ­თველოს მეცნიერებათა ეროვნული აკადემიის საერთო კრების გადაწყვეტილებით, რომელსაც ხმა უნდა მისცეს აკადემიის წევრთა სიითი შემადგენლობის უმრავლესობამ.

თავი XVII

გარდამავალი დებულებანი

1. საქართველოს მეცნიერებათა ეროვნული აკადემიის მოქმედ პრეზიდენტს, ვიცე-პრეზიდენტს, აკადემიკოს-მდივანსა და აკადემიის პრეზიდიუმის წევრებს უფ­ლებამოსილება უწყდებათ არჩევის ვადის გასვ­ლის­თანავე.
2. 2. ეს წესდება ამოქმედდეს 2025 წლის 1 სექტემბრიდან.

 

საქართველოს მეცნიერებათა ეროვნული აკადემიის პრეზიდენტი

აკადემიკოსი როინ მეტრეველი

თბილისი,

2025 წლის 23 ივლისი,

საქართველოს მეცნიერებთა ეროვნული აკადემიის საერთო კრების № 2 დადგენილება

 

წესდება