აკადემიკოსი სოლომონ პავლიაშვილი მსოფლიო ბანკის ანგარიშის განხილვას დაესწრო
- ნოემბერი 9, 2023
მსოფლიო ბანკმა საქართველოში მწვანე გარდაქმნის მხარდასაჭერად, ახალი ანგარიში გამოაქვეყნა, რომელშიც ბოლოდროინდელ პროგრესსა და იმ გამოწვევებზეა საუბარი, რომელიც მწვანე ეკონომიკაზე გადასვლის პროცესში არაერთ ქვეყანაში, მათ შორის, საქართველოშიც არსებობს.
ანგარიშის განხილვას საქართველოს მეცნიერებათა ეროვნული აკადემიის აკადემიკოსი, გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაესწრო და პანელურ დისკუსიაში „გამოწვევები, შესაძლებლობები და რეფორმების პრიორიტეტები მწვანე ბიზნესის მხარდასაჭერად საქართველოში“ მიიღო მონაწილეობა.
„ეკონომიკური ზრდის მისაღწევად, მწვანე ეკონომიკის მოდელზე გადასასვლელად და სათბური აირების ემისიების შესამცირებლად ქვეყანა არაერთ რეფორმას ახორციელებს. რეფორმების განხორციელების პროცესში, რა თქმა უნდა, არსებობს გამოწვევები, რაც, ვფიქრობ, ბუნებრივია სიახლეების დანერგვისას. ჩვენი ქვეყანა ენერგოეფექტურობასა და ეკონომიკის მწვანე მოდელზე გადასვლასთან დაკავშირებული სხვადასხვა რეგულაციის შემუშავებისა და ევროპულ სტანდარტებთან მიახლოების მნიშვნელოვან ეტაპზეა. აღნიშნული რეგულაციების პრაქტიკაში სრულყოფილად და სწორად ამოქმედებისთვის, საჭიროა სახელმწიფოს, კერძო სექტორისა და საზოგადოების ერთობლივი მუშაობა“, – განაცხადა პავლიაშვილმა.