კონკურსი სახელობითი პრემიების მოსაპოვებლად
- ივნისი 5, 2019
საქართველოს მეცნიერებათა ეროვნული აკადემია აცხადებს კონკურსს გამოჩენილ მეცნიერთა სახელობითი აკადემიური პრემიების მოსაპოვებლად:
- ლეონარდე დეკაპრელევიჩის სახელობის პრემია – კულტურულ მცენარეთა გენეტიკისა და სელექციის დარგში.
- აკადემიკოს ფრიდონ თოდუას სახელობის პრემია – ექსპერიმენტული და კლინიკური მედიცინის დარგში.
საქართველოს მეცნიერებათა ეროვნული აკადემია განსაზღვრული პერიოდულობით ანიჭებს გამოჩენილ მეცნიერთა სახელობით აკადემიურ პრემიებს თვალსაჩინო თეორიული ან პრაქტიკული მნიშვნელობის მეცნიერულ ნაშრომებს.
პრემიის მოსაპოვებლად შეიძლება წარმოდგენილ იქნეს ნაშრომი, რომელიც საქართველოს სამეცნიერო-კვლევით ინსტიტუტებში, უმაღლეს სასწავლებლებში, სხვა სამეცნიერო დაწესებულებებში ან ცალკეულ პირთა მიერ არის შესრულებული.
კოლექტიურ ნაშრომში პრემია მიეცემა იმ ავტორებს, რომელთაც დაადგენს წარმომდგენი ორგანიზაცია. პრემია შეიძლება მიეცეს ავტორთა ჯგუფის შემადგენლობაში შემავალ უცხო ქვეყნის მოქალაქესაც.
პრემიის გაყოფა ორ ან მეტ მაძიებელს შორის სხვადასხვა ნაშრომისათვის დაუშვებელია.
პრემიის მოსაპოვებლად შეიძლება წარმოდგენილ იქნეს ნაშრომი, რომელიც გამოქვეყნდა ბოლო ხუთი წლის განმავლობაში, მაგრამ არა უგვიანეს ექვსი თვისა განცხადების გამოქვეყნებამდე.
ნაშრომი, რომელსაც უკვე მიენიჭა სახელმწიფო ან რომელიმე სხვა სამეცნიერო პრემია, გამოჩენილ მეცნიერთა სახელობითი აკადემიური პრემიის მოსაპოვებლად არ მიიღება.
ერთსა და იმავე პირს ერთი და იგივე პრემია განმეორებით არ მიეცემა.
იმ ორგანიზაციებმა ან ცალკეულმა პირებმა, რომლებიც პრემიის მოსაპოვებლად კანდიდატს წამოაყენებენ, საქართველოს მეცნიერებათა ეროვნულ აკადემიაში წარწერით „ —————————————— სახელობითი პრემიის მოსაპოვებლად“ – უნდა წარმოადგინონ შემდეგი დოკუმენტაცია:
ა) საკონკურსო სამეცნიერო ნაშრომი სამ ცალად;
ბ) დასაბუთებული წარდგინება, რომელიც შეიცავს ნაშრომის მეცნიერულ დახასიათებას, მის თეორიულ ან პრაქტიკულ მნიშვნელობას მეცნიერებისა და ტექნოლოგიების განვითარებისათვის;
(ნაშრომი პრემიის მოსაპოვებლად შეიძლება წარმოდგენილ იქნეს სამეცნიერო-კვლევითი დაწესებულებების, უმაღლესი სასწავლებლების, სამეცნიერო საზოგადოებების, სამეცნიერო ცენტრების ან შესაბამისი დარგის წამყვან მეცნიერთა და სპეციალისტთა მიერ);
გ) მონაცემები ავტორის შესახებ (საანკეტო მონაცემები CV); ძირითად სამეცნიერო შრომათა და გამოგონებათა ნუსხა;
დ) წარმომდგენის დასტური იმის შესახებ, რომ კონკურსზე წარმოდგენილ ნაშრომს ადრე არ ჰქონია მინიჭებული პრემია.
ე) საკონკურსო დოკუმენტაციის ელექტრონული ვერსია.
მასალები პრემიის მოსაპოვებლად წარმოდგენილ უნდა იქნეს 2019 წლის 15 ივნისამდე შემდეგ მისამართზე: თბილისი, რუსთაველის გამზ., # 52, ოთახი 320.
დამატებითი ცნობებისათვის დარეკეთ ტელ. 2 99-00-52.